بهلول "يغنى": يا صباح الخير يا اللى معانا ...يا اللى معانا..الكراوان غنا وصحانا
سحلول "يستيقظ من النوم" : كراوان..اسكت يا غراب
بهلول: خليك دايما كده مكسر مأديفى
"وأثناء نزول بهلول وسحلول ع السلم قابلتهم جارتهم كبيرة السن أم أحمد"
أم أحمد: ألف مبروك يا ولاد شغلكم الجديد
بهلول: الله يبارك فيكى يا حاجه..وانتى عرفتى منين
أم أحمد: الواد أحمد قالى ونزل راح شغله بدرى وقالى انكم انتم اللى هتجيبولى العيش كل يوم..بدل ما بيتبهدل فى الطابور كل يوم وبيتأخر على شغله
بهلول: عنينا يا أم أحمد
أم أحمد "ماده يدها بالفلوس لبهلول": خد بأه هاتلى ب5 جنيه..ولا أقولك بجنيه كفايه ما انتم كل يوم هناك أكله طازه بطازه بأه كل يوم
بهلول: خلى يا أم أحمد...والله ما ينفع
أم أحمد: ربنا يباركلك يا ابنى وافرح بك
أم سمير"بائعة الجرجير": ألف مبروك يا أخويا..ونبى يا خويا جبلى معاك عيش وانت راجع..أنا والبت داليا بنتى..أنتم هتبأوا جوا الفرن وتستنضفولنا عيش بأه..خد اهى 5 جنيه جيبلنا بها ربنا يسعدك
بهلول:خلى يا أم سمير...ما يصحش والله
أم سمير: عيشت يا أخويا..صاحب واجب طول عمرك..لولولوووووووولى...الف مبروووك
سحلول: هو ايه اللى خلى...أيه اللى خلى ديه هتلم علينا الشارع كله
بهلول: مش أهل منطقتنا يا سحلول
سحلول: بقولك ايه يلا نلف من الشارع التانى...أحسن الشارع ده فى عم منعم بتاع الفول..وده لو طلب اننا نجيبله عيش من الفرن..أحنا كده هنشترى عيش الفرن كله لحسابنا..ده لو مرتبتنا قضت
"وصل سحلول وبهلول للفرن محملين بأمال الناس الغلابه...فى ان يعودوا لهم ومعهم الخبز الطازه"
المعلم شحاته "المسئول عن الفرن": أول يوم وجايين متأخر...لولا المياه قاطعه وكده..كده ما اشتغلناش..كنت عرفتكوا شغلكوا
سحلول: الحمد لله
"وبعد شوية ساعات عاد الماء"
" فعجنوا العجينه..وخمرت كمان..ووجب وضعها فى الفرن..قبل الزحام"
المعلم شحاته: الحمد لله..النور جيه فى وقته ..يلا اخبزوا العجين وبلاش لكاعه
"وبعد ان وضع الخبازين معهم بهلول وسحلول العيش فى الفرن..قُُُُُُُُُُُُُُُُطعت الكهربا"
المعلم شحاته: يادى النيله...انا اصطحبت بوش مين انهارده أدى اول الخبيز هيتحرق .. والفرن هيتزحم
الناس خارج الفرن: ما تيلا بأه ..احنا متعطلين عن أشغالنا
المعلم شحاته: يعنى هو بمزاجنا مش كفايه العجين اللى اتحرق فى الفرن..تو ما تيجى الكهربا هنشتغل
"وبعد ساعه النور جيه..فاكمل بهلول وسحلول عملهم..وعلى أخر اليوم أخدوا أجرهم"
بهلول: والله يا معلم...انا كنت عايز أخد ب 7 جنيه عيش
معلم شحاته: ب7 جنيه..وما قولتش ليه من بدرى..كل اللى بيشتغل هنا بياخد العيش الحلو من كل قفص..حاول..بأه تلم من زمايلك كل واحد رغيف ولا حاجه..يقضوك انهارده
بهلول: يا ادى الاحراج..والناس ال متعشمنا فينا ديه
سحلول: ما تكبرش الموضوع احكيلهم ع الظروف..تعالى اعزمك على قصب..انا هفطس من الحر اللى كان فى الفرن
"وعند محل القصب"
سحلول: 2 قصب لو سمحت
البائع: ادفع براه
"اتجه البائع للقصب وحمل عودين وشغل العصاره وحط فيها عودين القصب...وعندما وصل القصب داخل الماكنه للمنتصف انقطع النور"
البائع: نحس ايه ده ياربى ..تاخدوا الكوبايه ديه تخمسوا فيها سوا اباشا
سحلول: ما تدينا عودين القصب نمصهم واحنا واقفين أحسن
بائع عرقسوس "ينادى": العرقسوس الساقع..يا متلج يا عرقسوس
بهلول: تعالى بأه انا اعزمك على عرقسوس...أهو ده لا بيحتاج كهربا ولابيتعصر بعصاره
بهلول: 2 عرقسوس
بهلول"يشرب العرقسوس": ايه ده يا عم انت
بائع العرقسوس: ايه فى ايه؟
بهلول: ده سخن نار
بائع العرقسوس: أصل السوس الله يرحمه كان دمه حامى شويه
سحلول: الله يقرفك
بائع العرقسوس: ما انتم شايفين الجو عامل أزاى
بهلول: ولما انت شايف بتنادى بثقه أوى كده ليه وعمال تقول العرقسوس الساقع..العرقسوس المتلج
بائع العرقسوس: عاده بأه من أيام ما كان عندنا كهربا..وبنجيب تلج نحطه فى العرقسوس..بعدا انت عايزينى أقف أقول العرقسوس السخن...اشرب العرقسوس المولع!
بهلول: لأ قول العرقسوس..أبو دم حامى
البائع: هههه..عسل يا حضرت
سحلول: هى ايه حكاية الكهربا فى البلد
بهلول: زى ما انت شايف رمضان قرب وتلاقى الفوانيس اللى الناس معلقها فى كل حته أثرت على الاستهلاك العام للكهربا
سحلول: بأه الفوانيس أثرت على الاستهلاك العام.. ما هو بردوه أحنا اللى غلطانين فين الفانوس أبو شمعه بتاع زمان
بهلول: تيجى ندخل سنيما..بمناسبة أول يوم لينا فى الفرن
سحلول: موافق وأنا اللى عازمك كمان
"قطع سحلول...تذكرتين...وبما تبقى معه من أموال اشترى فشار...ودخل يتفرج على الفيلم"
بهلول: يا حلاوة التكيف..أيوه بأه عوضنا عن عصير السوس اللى شربناه ده
سحلول: اتفرج وانت ساكت بأه يا بهلول...بدل ما نبأه دفعنا الفلوس على الفاضى
بهلول: هو الفيلم ده بطولة مين
سحلول: كريم عبد العزيز
"بعد شويه"
سحلول: بهلول...بهلول...انت نمت...خساره فيك الفلوس الى انا جبتك بها السيما
بهلول: أصل بصراحه التكييف حلو اوى..وانا نفسي انام فيه من زمان..بعدا انت مدخلنى فيلم قديم عشان توفر..فسيبنى بأه استفيد من تمن التذكره واريح شويه
"يستقيظ بهلول على صوت عالى"
الناس: سيما أونطه هاتوا فلوسنا
بهلول: هو في ايه؟
سحلول: النور قطع وسط الفيلم
بهلول: حرام عليكوا ...انا دافع فلوس عشان اتفرج على كريم عبد العزيز...انتوا ما تعرفوش ان تعبت فى الفلوس ديه اد ايه..تقطعوا عنى الفيلم قبل ما ينتقم من اللى قتلوا منه شلبى أزاى...ها أزاى
سحلول: اسكت يا بهلول...هتودينا فى داهيه.. أحنا بنتفرج على أبو على ..التانى ده واحد من الناس..
بهلول: اصبر بس انا هجبلك فلوسك اللى انت ذاللنى بها
بهلول"بصوت جهور": طب والفشار اللى انا جايبه ده..اكله ازاى..انا ما اعرفش أكل الفشار غير جنب أفلام كريم عبد العزيز يا عالم يا ظالمه
"يخرج بهلول..وسحلول من السنيما"
سحلول: يعنى انا عازمك على سنيما وفشار .. عشان تدخل تنام
بهلول: انا مش جبتلك فلوسك يا عم الحاج..بعدا ده بدل ما تتمنى ان موضوع قطع الكهربا ده يتعمم فى كل السنيمات..تصور كده ندخل ننام فى التكيف..والنور يقطع ونأخد فلوسنا عيشه زي الفل..أحنا لازم نظبط مع مصلحة الكهربا اللى السنيما ديه تابعه لها
سحلول: اسكت بأه ويلا نروح ع البيت عشان انا اليوم قفل معايا خالص
بهلول: يلا..عشان حتى نروح بكره الفرن بدرى
بهلول "يفتح باب الشقه": أخيرا بيتى... سريرى...مروحتى
"وما لبثت المروحه ان تلف لفه..وأذا بالنور يقطع"
سحلول: انا قولت فى حد نحس هنا
بهلول: اصدك مين يا سحلول؟...يكونش اصدك على
سحلول: انت لسه هتخمن..أنا مش عارف اخبيك فين...انت كل ما تعدى فى حته فى القاهره الكبرى تضلمها..اتخمد بأه قبل ما تفجرلنا السد العالى وتضيع شوية الكهربا الباقيه فى البلد
بهلول: انت ليه رابطنى بالموضوع؟!.....قطع الكهربا ده من خطط الدوله...لاستبدال الكهربا بالطاقه الشمسيه..بس كل ما يجوا يفصلوا الكهربا ويوصلوا الطاقه الشمسيه عشان يجربوها..ما تشتغلش..اصبر انت بس عليهم لما يخلصوا المشروع
سحلول: طب عقبال ما يخلصوا المشروع..نام فى الطاقه الشمسيه اللى ماليا الأوضه بأه يا بهلول
بهلول: لأ يا سحلول...احنا مش لازم نستسلم ونبأه سلبيين..هو انت متعلم احسن علام ليه..مش عشان تواجه التحديات ديه بالعلم..قوم يا سحلول..أحنا مش لازم ننام انهارده قبل ما نشغل المروحه ديه بالحجاره
سحلول: خلاص وانا متبرعلك ب2 جنيه جيب بهم الحجاره وسيبنى أنام
"نام سحلول..تاركا بهلول..يبهدل فى المروحه اللى حيلتهم..وفى الصباح"
بهلول: حرامى...حراااااااامى
سحلول"يستيقظ مفزوع..ليجد بهلول ممسكا به": هو فين الحرامى ده
بهلول: ايه ده سحلول
بهلول "ضاحكا": والشنب ده طلعلك امتى
سحلول"يتحسس شنبه..ويجرى على المرايا": ده صُماد من الشمعه اللى انت سايبها جانبى وانا نايم :@
بهلول: احمد ربنا انها ما ولعتش فى السرير كله
