المطبات أمن قومى

المطبات أمن قومى

كل ما أشوف المطاردات فى الأفلام الأجنبى وأزاى المجرم ممكن يهرب بسهوله من الشرطه..نظرا للشوارع الممهده والبلعات المغلقه

بعرف أن المطبات أمن قومى

الحرامى فى مصر بيعانى لو حصل وصمد شارعين وما قابلش مطب قلب العربيه به أكيد فى الشارع التالت هيقابل بلاعه مفتوحه وهيقع فيها

أمال أنتم فاكرين المكان كله متحاصر اللى بيقولها بكل ثقه ديه ايه

متحاصر بالمطبات والبلاليع طبعا

عيد أضحى سعيد

أهم الأنباء: وردتنا أنباء عن تزايد فى أعداد الخرفان المختطفه .. ولم تعلن أى جهة عن 

مسئوليتها حتى الآن

مما أثار الرعب فى قلوب الخرفان .. وكعادة المعلم أبو ساطور أبو 

قلب أمور...وقف وقال بصوته الجهور ...والله ما حد هيحمى الخرفان 

ديه غيرى .. وده طبعا بعد ان ثبت بالدليل أن المعلم أبو ساطور

 ملوش فى اللحمه الضانى وانه بيدبح الحمير منذ زمان طويل..مما 

أكد حسن نواياه وأقبلت عليه الخرفان من كل مكان لتحتمى به

أما عن أخبار البورصه: فشهدت أسهم المعلم أبو ساطور أرتفاعا غير 

مسبوق من قبل..وده طبعا بسبب دعوات الخرفان له..ربنا يعلي 

سهمه .. وليس 

كما يظن البعض بأنه دبح الخرفان...فقد أكد أنه لم ولن يرفع اى 

ساطور على أى معزه أو جدى أو طور 

أما عن أخبار الطقس..فالجو أنهارده مشمس وجميل ولا داعى لأخذ 

فروتك معاك وانت خارج

معزتكم...أصدى محدثتكم: سوسو أبو فروه ...من أمام محلات المعلم 

أبو ساطور الجزار

كل سنه وانتم فى أطيب حال <3

خد بالك السلمه التالته مكسوره!!

خد بالك السلمه التالته مكسوره!! دائما ما نسمع هذه الجمله فى الأفلام العربى القديمه عندما يودع المضيف ضيوفه ..فيتجه للباب يودعهم ويحذرهم من السلمه التالته

- ليه التالته بلذات مش أى سلمه تانيه؟

- طب ياترى المخرج هو اللى كاسرها ولا هى كل الأفلام أتصورت فى نفس العماره ..وديه كانت عمارة الأنتاج الاعلامى فى ذلك الوقت "التى تحولت إلى مدينة الأنتاج الأعلامى لما ربنا فتحها علينا"؟ :)

- أم ان هذه هى كانت وسيلة الكاتب لكى يخبرنا أن ساكنى هذا البيت من الطبقه الفقيره وليس لديهم من الاموال ما يمكنهم من إصلاح السلمه التالته؟

- أم ان هذا كان حال بيوت مصر فى هذه الفترة من الزمان ..والكاتب كان يقصد بكلامه المقاولين الغشاشين بتوع زمان اللى كانوا بيسرقوا الأسمنت الخاص بالسلمه التالته ويعرضوا حياة المواطنين للخطر ويصبحوا معرضين فى أى وقت للسقوط بسبب هذه السلمه؟

عامة وانتم نازلين من بيوت قديمه برجاء تاخدوا بالكوا من السلمه التالته 

أما فى حالة نزولكم من بيوت جديده فما تاخدوش فى بالكم .... هتاخدوا بالكم من أيه ..ولا أيه؟؟؟؟؟

انزلوا صحبتكم السلامه :)

كوابيس مواطن

كوابيس مواطن "بهلول جاسوس"

"سحلول وبهلول أصحاب عمر دخلوا مع بعض أبتدائى وأعدادى وثانوى وأتخرجوا بتفوق بردوه من كلية علوم مع بعض...وحتى بعد التخرج عاشوا مع بعض فى شقه واحده عشان يوفروا...أما بالنسبه لعملهم فهما بيشتغلوا اللى موجود يوم كهربائين..أسبوع بوابين ..وساعات بودى جاردزعلى حسب أحتياجات المجتمع المحيط....وهنا هنحكيلكم بعض قصصهم"

"يلتفت بهلول لصديقه سحلول المقيم معه فى المنزل"

بهلول: أنا السبب أنا السبب

سحلول: أخيرا اعترفت يا بهلول أنك انت اللى كلت الرغيف اللى انا اشتريته...بعد ما وقفت أربع أيام فى الطابور

بهلول: رغيف ايه الموضوع أكبر من كده بكتيير

سحلول: لأ لأ ..أوعى تقولى أنك سخنت الرغيف قبل ما تاكله كمان .. انت عارف أخر مره أنا جايب الأنبوبه ديه بكم يا بهلول..أنا مش قايلك تحطوا فى الشمس وهو هيطلعلك أحلى من الطازه

بهلول: يا سحلول الأنبوبه خلصانه من شهر .. أنا خلاص فهمت وجهة نظر الحكومه فى الموضوع ده .. أنت عارف الحديده اللى بنلاقيها فى العيش كل مره أتارى ديه عشان توصل الرغيف بالكهربا فيسخن علطول

سحلول: أمال انت السبب فى ايه خنقتنى

بهلول: أنا اللى صورت الجاسوس جنب التلاجه .. أنا .. أنا ..بموبايلى ده بأيدى ديه

سحلول: جاسوس ايه؟؟!

بهلول: الجاسوس الأسرائيلى انت ما قريتش ورقه الجرنال اللى كان ملفوف فيها الجبنه انهارده؟؟

سحلول: وانت ايه اللى خلك تصوروا بس

بهلول: وعدنى يدينى الأيس كاب اللى هو لابسه وانت عارف انا نفسي فى واحد من زمان

سحلول: وخدت الأيس كاب فى الأخر

بهلول: وياريتنى ماخدتهه..طلع جاسوس معفن لابس أيس كاب برقعه

سحلول: وانت قلقان ليه ..وهما هيجيبوك منين؟؟

بهلول: بصماتى على الموبايل بتاعه ..أصلى كنت ببعتله الصور بالبلوتوث

سحلول: ما تقلقش الموضوع بسيط ..هما هيحطوك على جهاز كشف الكدب لو ما طلعتش كداب هيفرجوا عنك

بهلول: هو مش جهاز كشف الكدب ده اللى كانت بتستخدمه أسرائيل فى الأفلام ...هى مصر أشترت واحد

سحلول: أمال انت فاكر مصر بتهزر...ما هى مصر أتفقت معاهم تديهم غاز وناخد منهم جهاز كشف الكدب.....أنت عارف الحكومه بتاعتنا تسامح فى أى حاجه ألا الكدب

بهلول: طب وانا مش المفروض أتدرب عليه زى الأستاذ محمود عبد العزيز فى فيلم أعدام ميت ولا ايه

سحلول:أنا هدربك ..ديه لعبتى ..هاتلى رغيفين بأه من اللى انت بتكهربهم دول

بهلول"يجرى مسرعا ويجلب رغيفين لسحلول": خد يا معلم

سحلول:قولتلى بأه يا سيدى انك بتحط العيش فى الكهربا عشان يسخن ..صح؟

بهلول: تمام

سحلول: طب امسكلى الرغيفين دول فى ايديك كده

"ويقوم سحلول بتوصيل الكهرباء"

سحلول: قولتلى بأه...يعنى أنت السبب فى الكهربا الزياده اللى بتجلنا على الفاتورة يا بهلول

بهلول "يصرخ متكهربا" : لأ والله ده انا كنت بسخنهم وانا بتفرج على التليفزيون ...ما انت عارف السلك بتاع التليفزيون مقطوع فانا بوصله بالعيش

سحلول: أحنا هنستهبل يا بهلول ما انا اللى قاطعه...أنا مش اشترتلك ريموت وقولتلك تتفرج مع الجيران

بهلول "يصرخ متكهربا": ما هما بيصيفوا من أسبوع وقافلين الشبابيك..وبألهم شهر مشغلين الجزيرة وانا وحشتنى روتانا سنيما

"وقبل ان ينتهى أختبار كشف الكدب وقبل أن يجتازه بهلول..أذ فجأة تقتحم فرقة من الشرطة الشقه"

سحلول: تمام يا فندم أنا مكهربهُلكم وهو جاهز على أى اعترافات..والايس كاب على السرير جوه

بهلول: بتبيعنى يا ندل..يخونك العيش بالمسامير اللى كلنهم سوا

"يصل بهلول بسلام وكل احترام ودون ان يمسه سوءٍ من أى أنسان إلى مكان التحقيق..فيقابل ضابط بكاب"

بهلول:الباشا هو اللى هيفهمنى..أنا يا باشا والله ما هكدب سيادتك بس ودينى على جهاز كشف الكدب سيادتك وانا هقول كل حاجه

الظابط: هايل أوى شكلك مش هتتعبنا معاك يا بهلول..قولى بأه عرفت منين عن جهاز كشف الكدب ده

بهلول: يا باشا ده بيجى فى كل الأفلام الجاسوسيه.....يعنى كل نجومنا الكبار أتدربوا عليه

الظابط: وانت بأه مين فى أسرئيل اللى دربك عليه يا بهلول؟؟

بهلول: لأ يا باشا أسرئيل أيه ..ده فى بيتنا هنا سحلول صاحبى هو اللى كان بيدربنى عليه ..ده مصرى مائه فى المائه

الظابط: وسحلول بأه ده الاسم الحركى بتاعه

بهلول: لأ انا من ساعة ما عرفتوا واسمه ثابت ما بيتحركش والله يا باشا

الظابط: يا بهلول أنت الجريمه لابسك ..لابسك فاعترف بدل ما تلبسها لوحدك

بهلول: ألبسها لوحدى ليه ياباشا أمال الجاسوس اللى انتم مسكتوه ده ايه..أنا برئ حتى أسألو أيلان

الظابط: أيلان عنده بلد تسأل عليه يا بهلول..لكن انت هنا فى بلدك..وطنك..مصر يا بهلول..مصر... بعت مصر بكم يا بهلول؟؟

الظابط: بيعتها بأيس كاب يابهلول..وبرقعتين كمان

بهلول: لأ يا باشا لأ....أنا الايس كاب بتاعى كان برقعه واحده والله

الظابط: شكلك هتتعبنى معك يا بهلول خدوا يا عسكرى وريه جهاز كشف الكدب المصرى

"يخرج بهلول مع العسكرى ويمشى فى ممر طويل والعساكر يغنولوا "كداب يا خشه كداب أوى" حتى يصل إلى غرفه بعيده وتغلق أبوابها عليه"

بهلول"صارخا": أنا جاسوس.....أنا جاسوس

"وهنا يستيقظ بهلول من النوم مفزوع"

بهلول: لأااااااااااااااااااااا

"ينظر بهلول حوله فى المكان فيجد نفسه مازال فى بيته فى أمان وبجواره صديقه سحلول..يجرى بهلول على سحلول ويحتضنه"

بهلول: كده يا سحلول تبيعنى

سحلول: ياعم فوق وارحمنى من كوابيسك بأه....بدل ما ارميك أدام أى باب ملجأ..ويلا قوم عشان انهارده دورك فى طابور العيش

بهلول: لأ ياعم انا عايز انام

سحلول: قوم يا بهلول بدل ما أسلم الأيس كاب للشرطه

أسبوعيات عاطلة "الجزء الرابع"

"ولأن الشركة ما اتصلتش وشكل احلام ما اتقبلتش, فقامت عملت سيرش على بعض

اسامى الشركات وأخذت العناوين وارقام التليفونات وقسمتهم لمجموعات وصنفتها 

على حسب المناطق والطرقات وقررت أن تبدأ بمنطقة المعادى نظرا لأن بها أكبر عدد من الشركات على حسب الأحصائيات الناتجه عن هذه المجموعات"

"نزلت أحلام من البيت تحمل فلاشه وفى رجلها لبست كوتش ليساعدها على المشى, طبعت أحلام -السي في-, واشترت بعض الفايلات ووزعت عليهم -السي فيهات-"

"وبعد ان وصلت أحلام أمام أول شركه من الشركات فهذا ما كان"

"دخلت أحلام بسلام دون أن يعترضها حارس ولا أى سيكيورتى مان وتوغلت فى المكان حتى فاجأها صوت انسان "

الموظف: على فين؟

أحلام :كنت عايزه الأتش أر "HR"

الموظف: يعنى عايزه تقدمى -السي فى-

أحلام :ايوه

الموظف: بس أحنا مش طالبين موظفين

أحلام: طب ينفع أسيب -السي فى- بتاعى هنا .. يعنى لما تحتاجوا هتلاقوه بردوه مش هيضر 

الموظف: لأ لما نعوز نبأه ناخد

أحلام فى نفسها: يعنى هو السي فى هيزحم المكان ولا فيه متفجرات ولا ايه 

أحلام: معلش خليه عند حضرتك

الموظف: هاخده منك هرميه فى الزباله

أحلام: طب أنتم لما بتعوزوا موظفين ياترى بتنزلوا الاعلان فى أنهى جريده؟

الموظف: أحنا ما بننزلش أعلانات أنتى كل شهر كده تيجى تسألى لو فى وظايف جديده

"خرجت أحلام وهى حزينه و-السي فيهات- فى ايديها سليمه لم تنقص ولا واحد"

"مسكت أحلام الورقه المكتوب فيها عناوين الشركات..وأخذت تقرأ وتسأل الماره على أماكن الوصول لهذه الشركات وصلت أحلام للشركه التانيه فأوقفها رجل الأمن على الباب"

رجل الأمن: على فين؟

أحلام: عايزه أقابل _الأتش أر_ بتاع الشركه ديه

رجل الأمن: عايزه تسيبي -السي فى- 

أحلام"فى نفسها": ماشاء الله أيه ده نفس الحوار ...هو ده بيحفظوهلهم قبل ما يشتغلوا ولاايه؟!

أحلام: ياريت

رجل الأمن:سيبيه معايا وانا هوصلهم

أحلام: أيه ده يعنى هما عايزين موظفين بجد؟

رجل الأمن: أه بصى انا عندى -سي فيهات- أد ايه

"وعرض على أحلام عشرات -السي فيهات-"

أحلام:ماشاء الله ..ما شاء الله ...كل دول عاطلين فى مصر ... ودول كلهم على وظيفة واحده

رجل الأمن: ده غير اللى أنا بطلعهولهم كل يوم

"تركت أحلام -السي فى- وسط عشرات -السي فيهات- وبذلك تخلصت أحلام من أول -السي فيهات- لعله يفك النحس ويجر وراه باقى -السي فيهات- وعلى أثره تستقبل أحلام المكالمات المطالبه بعمل مقابلات استعدادا لتسليمها الوظيفة فى أحدى الشركات"

"ورجعت أحلام تنظر فى الورقه بحثأ عن العنوان التالى .. ولكنها قبل هذا لمحت يافطة على أحد العمارات باسم أحد الشركات فطلعت أحلام لتقديم -السي فى- هناك"

"وجدت أحلام الباب متوارب فخبطت خبطتين على الباب ولم يجب أحد..فدخلت أحلام لهناك ولم تجد أى شخص فى المكان"

أحلام "لنفسها": أنا بقول أخد بعضى وأجرى أوام بدل ما يتهمونى بسرقة المكان

أحلام: السلام عليكم

"وأذ فجأة على كرسي بعيد بيلف لتظهر أمرأه"

المرأه: وعليكم السلام

أحلام: عايزه أقدم -السي فى- بتاعى لو سمحتى

المرأه: لأ ما بنوظفش بنات

أحلام"فى نفسها": أمال حضرتك هنا بتعملى ايه بالظبط...وظيفتك ترفضى البنات اللى بيقدموا -سي فيهات- 

"لفت أحلام على باقى الشركات واستطاعت التخلص من خمس -سي فيهات- ولكن دون ان تستطيع حتى الدخول من الباب أو رؤية شكل تلك الشركات ...فقد كانت تُجبر على أن تترك -السي فى- مع رجل الأمن على الباب" 

"وبعد ان انهت جولتها فى المعادى طلعت على العباسيه ...ليس لأنها أصابها الجنان..فهناك كما تعلمون الصرايا الصفرا أو ما يدعى المُرستان..وانما لوجود عدة وزرات فلعل الوظيفه منتظرها هناك"

"وحتى لا أطيل وأتكلم كتير...فقد رفضوا جميعا قبول -السي فى- منها وقالوا لها أنتظرى ليناير وهننزل أعلانات نطلب فيها موظفين وموظفات...إلا وزارة واحدة كانت وزارة الكهربا فدخلت أحلام الوزارة وهذا ما جرى"

أحلام: السلام عليكم

الأمن: وعليكم السلام

أحلام: عايزة أقدم -السي فى- 

الأمن: لأ مش بناخد -سي فى-

أحلام"فى نفسها": هى _السي فى_ ديه كلمه قبيحة ولا انا بعرض عليهم رشوة أيه ما بناخدش –سي فيهات- ديه

"وعندما همت أحلام بالرحيل واليأس يصاحبها فى نهاية كل هذه المشاوير نداها رجل الأمن قائلا"

الأمن: أنتى معاكى ايه

أحلام :هندسة اتصالات

رجل الأمن: طيب عدى الناصيه اللى قدمنا أشترى منهم طلب ب2جنيه وتعالى أقولك تقدميه فين

"عدت أحلام الناصيه المقابله وهى طايرة من الفرحه وبعد أن أحضرت الورقه أم 2 جنيه ذهبت لرجل الأمن أوام عشان تعرف المكان اللى تقدم فيه طلب التوظيف..وبعد أن دلها على الطريق ذهبت إلى هناك وهذا ما كان"

أحلام: السلام عليكم...عايزه أقدم طلب عمل

الموظف: معاكى ايه

أحلام: بكالوريوس هندسه

الموظف: أنتى من أبناء العاملين

أحلام"متنحه": لأ

الموظف: معاكى كارت توصيه

أحلام"تنحت أكتر": لأ

الموظف: مش هينفع نشغلك

الموظف"يشير لأحلام على بعض الواقفين الذين يملاءون استمارات للعمل فى الوزاره" : بصى أهو دول أولاد موظفين بيملوا استمارات 

"تمنيت أحلام لو ان الموظف لم يخبرها بهذا الكلام خوفا على صحة الواقفين من أبناء الموظفين من أن يُهد عليهم سقف المكان نتيجة النظرة الشريرة التى رمقتهُم بها أحلام الناتجه عن ألامها فى البحث عن وظيفة منذ الصباح الباكر وحتى الآن ...بل منذ سنه فاتت كمان"

أحلام"تخرج عن هدؤها قائلة بصوت مرتفع": مفيش حد يتبننى هنا"

"نظر الناس فى المكان بأتجاه أحلام ..مما جعلها تخرج على استحياء من المكان وعادت إلى بيتها تتسأل هل أخطأت أحلام أنها لم تدخل كلية دخلها أهلها قبلها..وأذا كانت والدتها معلمة واحلام لا تجيد التدريس فهل يجب أن تُضيع مستقبل الجيل لأن الوظايف أصبحت بالتوريث"

"ونظرا لأن كل محاولات أحلام باءت بالفشل ونظرا لأنها لا تجد حتى الأن فرصة عمل فهنا أقول لكم سلام ووداعا لأسبوعيات العاطله أحلام...مع الوعد بعودة الأسبوعيات أذا ما وجدت أحلام طريقة جديده للبحث عن وظيفة أو العودة فى النسخة الجديده و"أسبوعيات عامله" ... أذا حالف أحلام الحظ ووجدت الوظيفة"




لقرأة الجزء اللى فات دوس هنا أو هناك

أسبوعيات عاطله "الجزء التالت"

"تستيقظ أحلام من النوم مبكرا زى كل يوم لكن هذا اليوم ليس كأى يوم فهو يوم الثلاثاء حيث ستحظى أحلام بأول مقابله لها على الأطلاق"

"بعد ما فطرت أحلام دخلت على النت عشان تعرف ايه المطلوب لتفوت من الانترفيو بسلام"

توصل أحلام للعنوان وكانت جايه بدرى كمان فتلف شويه فى المكان حتى بقى على معادها عشر دقايق تمام تطلع فى الاسانسير"

أحلام: السلام عليكم انا عايزه أطلع للدور ال17

عامل الاسانسير:انتى طالعه تقدمي على شغل ولا ايه

أحلام: اه باين عليا ولا ايه

عامل الاسانسير: ربنا يوفقك هما بيوظفوا ناس كتير ان شاء الله تلاقى وظيفه

أحلام: يـــــارب

"أحلام توصل فى ميعادها تمام و هذا ما كان"

أحلام :السلام عليكم كنتم كلمتونى عشان أعمل انترفيو انهارده

موظف الاستقبال: مين اللى كلمك بالظبط

أحلام "فى نفسها " : من الأول كده مفيش مصدقيه فى كلامى...شكلى لازم أشد عليهم شويه

أحلام : استاذه دينا

موظف الاستقبال: طب أتفضلى ارتاحى شويه

"تجلس أحلام بجوار أحد المتقدمين اللى بردوه لدورهم مستنين وكعادتها تبتسم أحلام لعلها تجد فى المتقدمين من يبادلها الابتسام فتتكلم معه ليقل توترها وتشعر بالأطمئنان ولكنها تجد مقابل بسمتها نظرات جامده فتختفى البسمه من على وشها أوام "

أحلام"فى نفسها": اه شكلنا كده قبل ما نشتغل هنبدأها بنفسانه و شكلى هشوف أيام سودا معاكم

"وبسرعه جاء دور أحلام ودخلت على أوده صغيرة جدااا وفضلت لوحدها فيها شويه"

أحلام"لنفسها": ده أختبار نفسي ولا ايه بيشوفنى هستحمل كم دقيقه من غير ما أحاول أكلم حد ولا انا كنت عامله قلق براه ولا ايه

"يدخل موظف ال أتش أر "hr" على أحلام ويعرفها بنفسه فتبتسم أحلام ابتسامه بلهاء"

أحلام "فى نفسها":شكله كده عايزنى أعرف نفسي.... ما هو مكتوب فى السي فى اللى فى أيده وهو انا يعنى تعبانه فيه عشان ايه...مش رده عليه غير لما يسألنى

ملحوظه:"كل الحوار اللى جاى ده دار بالانجليزى ولكنه سيعرض مترجم"

الموظف: عرفى عن نفسك

أحلام"فى نفسها" : انا قلت شكله غبى وهيتعبنى معاه .. امرى لله أعرفه بنفسي 

أحلام: اسمى أحلام مهندس..اعيش مع أمى وابى وأخين وتخرجت من كلية هندسة جامعة القاهرة..من هواياتى الرسم ونفسي أطور نفسي فى مجالات كتير اتمنى الشغل يساعدنى فى ده... و نفسي اشتغل عشان أحس بالاستقلالية وانى عامل فعال فى المجتمع واتمنى انى الاقى ده هنا

أحلام"فى نفسها": غيّر السؤال بأه عشان انا مش لاقيه حاجه تانيه أقولها.....بدل ما أسمعلك شهادة ميلادى كلها والله

الموظف: قولى مميزاتك وعيوبك

أحلام: مميزاتى....انى اجتماعيه وصبورة...........العيوب ممكن يكون ابتسامتى المستمرة 

الموظف: تعرفى ايه عن خدمة العملاء

أحلام: خدمة العملاء هى التعامل المباشر بين الشركه والعملاء بتوعها

الموظف: طيب انتى ليه عايزه تشتغلى فى خدمة العملاء مع ان ده مش تخصصك

أحلام"فى نفسها": يعنى هو انا لقيت غيركم عبرنى وقلت لأ

أحلام: الشغلانه ديه هتساعدنى على تنمية مهاراتى اللغويه...غير انى بحب أساعد الناس ...وعندكم هساعد الناس فى حل مشاكلها وكمان هاخد على ده فلوس J

الموظف: طيب يا أحلام ان شاء الله هنرد عليكى خلال أسبوع

"خرجت أحلام مع ابتسامه واسعه ترتسم على شفتيها فقد كانت كل الاسئله من المنهح زى ما ذاكرتها من على النت الصبح........وأول ما خرجت وجدت أستقبال حافل من الناس اللى كانوا بيبصولها بجمود....حيث تجمع حولها ثلاثة بنات من المعجبين...أصدى اللى كانوا معاها متقدمين للوظيفه"

البنت الأولى : ها عملتى ايه ؟

أحلام: الحمد لله... الموضوع سهل ما تقلقوش

البنت التانيه: طب ده اول انترفيو لكى 

أحلام : اه بصو الاسئله عباره عن 

عرفى نفسك بالانجليزى

وقولى عيوبك ومميزاتك

عايزه تشتغلى ليه فى خدمة العملاء

البنت التالته:طب وقولتيله ايه عيوبك

أحلام : قلتله انى علطول مبتسمه

البنت الاولى والتانيه:ربنا يوفقك ويوفقنا كلنا

أحلام :يارب ...ونشوف بعض قريب متوظفين مع بعض

"وذهبت أحلام بسعاده ويقين بأن هاتفها المحمول سيرن عن قريب ويبشرها بالخبر السعيد وانها نجحت وهتستلم العمل الجديد"

"وبعد مرور سبع ايام بالتمام"

أحلام"تحدث هاتفها المحمول": رن بأه رن انهارده أخر يوم فى الاسبوع...رن وانا أوعدك انى هروقك من أول قبض..هجيبلك وش جديد وهعلق فيك لعب من اللى بتنور... 

"وفى أخر الليل بليل"

أحلام "لنفسها": طب أنام ولا يمكن يتصلوا...يمكن يكون مش معاهم رصيد ..طب يبعتولى كلمنى شكرا..سلفنى شكرا....يا خوفى لا فى الأخر يبعتو يقولولى عفوا لقد نفذ رصيدكم....أصدى لقد وظفنا غيركم

"دخلت أحلام تنام وهى حزينه وحالتها مش تمام" 

"وقد اتخذت أحلام القرار..بإلا تكتفى بالبحث عن وظيفة على النت وفى الجرنال..

فقد ..قررت أن تنزل بنفسها وتواجه العدو..أصدى الشركات فى عقر دارها"

"فهل يا ترى الشركه فعلا معهاش رصيد وستكلم أحلام بعد شحن الرصيد عما قريب أم ستنزل أحلام للبحث عن عمل يوم التلات وستستمر فى كتابة الأسبوعيات"

لقرأة الجزء اللى فات دوس هنا

أسبوعيات عاطله "الجزء التانى"

أحلام"تقرأ رساله من على ياهوو": فرص عمل لحديثى التخرج

الحمد لله كده ضمنا نتوظف

"وتفتح أحلام الرساله”

هكذا اختاتمنا الجزء الاول من الاسبوعيات

"تفتح أحلام الرساله لتجد العديد من الشركات..على عكس كل التوقعات"

أحلام: مصر لسه بخير ..اُمال أزاى فى ناس مش لاقيه شغل ما الوظايف هنا بالميات ده لو كل الوظايف ديه خاليه فعلا ده كده احنا محتاجين نستورد عماله بأه

"وأخذت تقرأ أحلام ما تشترطه الشركات فى المتقدمين والمتقدمات

كانوا فعلا لايشترطون عدد سنين من الخبره ولكنهم كانوا يشترطون الكثير من الكورسات..وهى لا تعرف سوي ما خرجت به من الكليه من مهارات"

أحلام "تكلم نفسها": كان لازمتو ايه الدراسه بأه ووجع القلب ده انا لو كنت خدت كورسات فى اى مجال لمدة سنه واحده أحسن من الخمس سنين اللى قضيتهم فى الكليه ملهاش لازمه

أحلام"فى أمل مفتعل حتى لاتصاب باليأس و الاحباط": كده من وسط العشر شركات ديه انا ممكن اتجرأ وابعت لشركه او اتنين من الشركات ديه ورغم انها مش فى مجال تخصصى إلا انها وظيفه ممكن اشتغلها لحين ما انمى مهاراتى وأخد شوية كورسات

أحلام"تمسك ورقه وقلم": كده بأه انا محتاجه عشان اشتغل أخد كورسات ايه......

"وكتبت أحلام لسته طويله من الكورسات ودخلت على أحد المنتديات لتحميل أول هذه الكورسات على شكل فيديوهات"

"وبعد ان بعثت احلام - بالسي فى- بتاعها لبعض الشركات نزلت مسرعه عشان تلحق تروح على أحد الملتقيات التوظيفيه وتوزع - السي فى- بتاعها هناك حيث يوجد العديد من الشركات لعلها تجد الفرصه هناك"

"وأعدت شويه فى الموصلات"

"تدخل أحلام الملتقى لتجد من الشركات ما لذ وطاب"

أحلام: دهب ياقوت مرجان ان حاسه انى على بابا وشكلى هحتاج - سى فيهات- زياده للاربعين حرامى ..... أصدى للشركات ديه كلها

"تدخل أحلام على الشركه الأولى بكل تفاؤل ..... وهذا ما كان"

أحلام: السلام عليكم ممكن أعرف طالبين وظايف ايه بالظبط

الموظف:"بعد شرح طويل عريض ملوش لازمه وتصوير شركته انها أجمد شركه"أحنا عايزين مهندسين عماره ياريت لو تعرفى حد من أصحابك ما اشتغلش تقوليلوا علينا وده الموقع بتاعنا ياريت يبعت عليه

أحلام"بشئ من الحقد على مهندسين عماره": يعنى هما مهندسين عماره مستنيكم ده من بين كل تلت أعلانات فى الجرنال فى خمسه منهم بيطلبوا مهندس عماره أو مدنى

"ولكن لم تخرج أحلام صفر اليدين من أول شركه فقد أخذت بنبونيه من الموظف مكفأتاً لها على تحملها له للنهاية"

أحلام: مسيري هلاقى شغل ده أحنا اللى مشغلين الصين والفلبين مش هنعرف نجيب شغل للمصريين

"وهذا ما كان فى اللقاء التانى"

أحلام: السلام عليكم ممكن أعرف انتم طالبين وظايف ايه

الموظف: احنا هنا مش عايزين نوظف حد

أحلام"فى نفسها": أمُال جاين تغيظونا..ولا بتدوروا على شغل انتوا كمان

أحلام : امُال ايه

الموظف: أحنا هنا بندى كورسات بأسعار مخفضه ممكن تكتبلنا ايميلك وهنبعتلك نشره بكل الكورسات اللى عندنا

"وخرجت أحلام بنوتة تليفونات هديه من هذه الشركه

وهكذا أستمر الحال مع أحلام تلف فى الملتقى وماحدش عايز يجبر بخاطرها وياخد -السي في- من أيدها..ولكنها كانت دوما لا تخرج خالية اليد ..فقد كانت تخرج باللى فيه النصيب أما بكيس مناديل أو قلم أو بنبونيه .. حتى أنجرفت أحلام وراء الهدايا وبدل ما تتخلص من - السي فيهات- اللى معها رجعت ومعها حموله زياده من بنبونى وأقلام ومناديل"

أحلام "فى نفسها": والله الواحد طلع من الملتقى ده بأفكار بردوه .. انا ممكن أبيع شوية الحجات اللى انا خرجت بها من الملتقى ده على محطة المترو وكل واحد يشترى حاجه ياخد - سي فى- هديه وبكده أخلص من - السي فيهات- اللى معايا

"وبعد ان عادت أحلام للبيت بعد يوم مُجهد طويل ولم تتخلص إلا من - سي فى- واحد أذا بها تريح قدميها من المشواير ولكن يبدو ان الراحه لاتجد لأحلام سبيل

حيث يرن الهاتف فتذهب أحلام لترد"

أحلام"تصرخ وهى سعيده": نمره غريبه...نمره غريبه

"فقد كانت أحلام تحب النمر الغريبه لعلها تجلب الوظيفه التى تبدو حتى الآن بعيده"

أحلام: السلام عليكم

فتاه: وعليكم السلام انتى كنتى بعتى -السي فى- بتاعك لشركتنا

أحلام"فى نفسها": يمكن وانا يعنى مخى دفتر ... انا أصلا نمرتى مع كل شركات مصر

أحلام: أيوه فعلا هو انا اللى بعت

الفتاه: طب ينفع تيجى تعملى معانا مقابله يوم التلات الساعه 2:00

أحلام "تفكر فى مخها": أتقل عليها ولا أوافق ...فكرى بسرعه يابت يا حُلُم

أحلام: أه مفيش مشاكل خلاص يوم التلات ان شاء الله بس هى الوظيفه ايه بالظبط

الفتاه: خدمة عملاء ...فى مشاكل

أحلام: لأ أبدا معادنا يوم التلات

"وكانت هذه المكالمه السبب فى رسم البسمة على وجه أحلام قبل ما تدخل تنام"

"وهنا أدركت أحلام المساء فنامت تحلم بمقابلة يوم الثلاثاء فهل يا ترى ستتحقق أحلامها أم ستستمر فى كتابة أسبوعياتها"

لقرأة الجزء اللى فات دوس هنا

مميزات البطاله

مميزات البطاله

أولا: كلمة بطالة من مشتقات كلمة بطوله "بطل .. بطوله .. بطاله"

ثانيا: كل أيامنا أجازة ... وبكده لايهمنا ثورة يوليو كانت يوم سبت ولا هما حرروا سينا يوم الجمعه .. فنحن لا ننتظر ان تمن علينا الحكومه بأجازه فى هذه المناسبات

ثالثا: نستمتع بالخروجات فى أيام الأسبوع الخمسه الباقيه حيث لا يشاركنا الأخوة العاملين فى الحدائق والمتنزهات

عزيزى العاطل شعارنا الأيد البطاله نعمه

تعلمت"متجدد كل مااتعلم حاجه" :)

علمنى الطبيخ: ان سي السيد عاش مخدوعا طوال عمره فاكر ان أمينه بتاكل اللى يفضل منه وهى بتكون واكله نص الحله وهى بتطبخ أصلا وهو من يأكل ما يتبقى منها ;)

علمنى تويتر:أن أبوس أيدى وش وضهر على ال 420 حرف بتوع الفيس بوك رغم أنهم بردوه مش بيكفونى


علمتنى الأفلام العربى:دائما ما يهتم السفاح باخفاء وجهه بينما ينسي 


أخفاء أهم شئ "الجزمه" رغم أن كل الأفلام العربى أثبتت أن 


السفاح بيتكشف من جزمته 

اسبوعيات عاطله "الجزء الأول"

اسبوعيات عاطله لاتكل ولا تمل

وفى صباح اليوم الاول من الاسبوعيات

استيقظت بكل حيويه ونشاط

احلام بطلت الاسبوعيات

وكانت تنام مبكرا وتستيقظ مبكرا

مش عشان ما اتعودتش تسهر

ولا انها من محبى برنامج صباح الخير يا مصر

ولا طموحها انها تبيع لبن

لكن عشان تلحق تقرأ الاعلانات فى الجرايد والمجلات ولتكون أول من يقرأها

وتلحق الوظيفه قبل منفسينها من العاطلين والعاطلات"

أحلام: استعنا على الشقا بالله يا مسهل

"وقبل ما تفتح الجرنال تدعى دعاءها اليومى أصدى الاسبوعى"

احلام: اللهم ارزقنى وظيفة تكون حلوه ولطيفه أو حتى سخيفة بس تكسر النحس وتزيح الغمه وأحس بأه انى ليا لازمه

"وكانت هذه أول مكالمه"

أحلام:السلام عليكم

"يرد عليها أحد الموظفين يبدو على صوته ان أحلام أيقظته من النوم فقد كان لا يهمها إن كان اليوم جمعه أو سبت المهم تحصل على الوظيفه بأسرع وقت"

الموظف النائم: وعليكم السلام

أحلام: كنت قريت فى الجرنال ان عندكم وظايف خال..

"وقبل ان تكمل احلام الكلام "

الموظف: انهارده أجازه..اتصلى بكره

"تغلق السكه فى وجه احلام"

أحلام"بكل تفاؤل": كويس جدا كده هيعرفوا انى نشيطه وبصحى بدرى حتى فى الاجازات...بس يا خوفى لايشغلونى مكان البواب ما هو اللى بيشتغل فى الأجازات ويقولوا عليا سيكيورتى ويلبسونى قميص لبنى وكاب ...وأدى النمره اللى بعدها

الموظفه: ألو

أحلام: السلام عليكم قريت انكم طالبين موظفين هنا

الموظفه : الشغلانه دى عشانك

احلام"فى نفسها": امال يعنى عشان اطمن على مستقبل عاطلين مصر

احلام: اه عشانى

الموظفه: اه بس للأسف الاعلان طالب موظفين شباب ولاد يعنى

أحلام: طب ما عندكمش اى حاجة للبنات

أحلام"فى نفسها":والله ابلغ عندكم جمعيات حقوق المرأه

الموظفه"بشئ من الشفقه وكأنها تعلم بما تواجهه احلام": لأ يا حبييتى ربنا يوفقك

" اما عن باقى الاعلانات فكان أغلبها كالتالى مطلوب للعمل بأحدى الشركات .... هذه فقط مقدمة الاعلان دعونا نتعمق قليلا فى الاعلان...يشترط خبرة "2-5-7"سنوات على الاقل فى نفس المجال"

أحلام: ما انا خبره فى الكليه خمس سنين وكمان خبره فى البحث عن وظايف سنه لدرجة انى بقيت امسك الجرنال أقرا صفحة الرياضه ومن عدد الاهداف اعرف الجرنال ده فيه كم شركه هيقولولى ابعتى على الايميل ومش هيعبرونى وكم شركه هتقفل فى وشى التليفون زى ما يكونوا بيعملوا تعداد للعاطلين فى مصر والاعلانات ديه تمويه 

"وبعد ان انتهت من الجريدة جاء وقت البحث على النت

حيث كانت أحلام عضوه نشيطه فى كل منتديات البحث عن وظائف وجروبات الياهوو والفيس بوك و لأن احلام مش عاطله أى كلام فهى توسع مجال بحثها عن وظيفة بالبحث المستمر عن جروبات التوظيف والاشتراك بها"

وكالعاده تبدأ بدعاء النت

أحلام: اللهم ان كان نصيبي ليس فى الجرنال فاجعله يصيبنى من على النت كالفيروسات

ولا ينفع معاه لا انتى فيرس ولا فورمات 

بسم الله نبدأ السيرش

"وكانت اول رساله مفجأه سعيده لأحلام ...بجد ولا فى الاحلام"

أحلام"تقرأ رساله من على ياهوو": فرص عمل لحديثى التخرج

الحمد لله كده ضمنا نتوظف

"وتفتح أحلام الرساله... فهل يا ترى ستجد ما تبغاه ام ستكمل اسبوعياتها هنا بمشيئة الله"