بهلول موظف تسويق

بهلول موظف تسويق

بهلول "يجلس على طشت الغسيل ويغنى": مفيش حاجه تيجي كده اهدى حبيبي كده واغسل زى زمان

سحلول:غير الاغنيه يا بهلول غسيلك بيطلع وحش بالاغنيه ديه

بهلول:فشــــــــر ... ده انا مفيش انضف ولا احلى من غسيلى بس انت اللى بتوفر ولا عايز تجيبلى كلوركس للألوان ..ولا البتاع التانى ده ابو ريحه تدوم ل14 يوم

سحلول: هو ده اللى انت فالح فيه ..حافظ كل اعلانات التليفزيون

بهلول "يكمل الغسيل": هما الحلوين علشان حلوين يغسلوا كدهو..ولا الطعمين علشان طعمين يشطفوا كدهو..ويعصروا كدهو..كدهو ..كدهوا

سحلول: انا جاتلى فكره حلوه استغل بها موهبتك ديه يا بهلول

بهلول: هتنتجلى البوم مش كده

سحلول: اه ويستخدموه بدل الفليت .. الا انت مش واخد بالك ان الحشرات والدبان مش بيعتبوا البيت يوم الغسيل بسبب صوتك

بهلول: دايما كده مكسر مأديفي..امال هتستغل موهبتى ازاى؟

سحلول: ايه رأيك تشتغل فى ال marketing

بهلول: وانا يعنى هقولك لأ.. بس هنسوق ايه..وكمان مين هيوافق يشغلنا؟

سحلول: ما تقلقش المكان اللى هنشتغل فيه لا حد هيرفضنا ولا حد هيقبلنا ...مفيهوش انترفيو اصلا

بهلول: بـــس ....تبأه نويت تسوق عفش البيت .. ميت مره اقولك انا مش هفرط فى الكرسي الهزاز بتاع جدى

سحلول: أصدك على الكرسي اللى رجله مكسوره .. فبيتهز من الهوا...وبيقع بك لما تأعد عليه

بهلول: بردوه مش هفرط فيه .. ده جدو مات عليه

سحلول: ما هو عشان رفض يبيعه ووقع به يا بهلول...عامة ما تخافش انا مش هبيعه يمكن تحصل جدك واخلص منك

بهلول: امال هنبيع ايه؟...وفين؟

سحلول: بخصوص فين فالاجابه فى المترو...اما بأه ايه ..فده يتوقف على قدراتك والمنتج اللى تعرف تبيعه..المهم يكون متوافر فيه المواصفات ديه .....خف حمله ورخص تمنه

بهلول: خف حمله...ورخص تمنه؟!!!!!

سحلول: رخص تمنه عشان انت زبونك الموظف الغلبان اللى تلاقيه اصلا مزوغ من دفع تمن التذكره..اما بخصوص سهل حمله فده عشان وقت اللزوم تبأه حركتك خفيفه وتعرف تهرب بالبضاعه

بهلول: اهرب من مين؟....هى البضاعه اللى هنبيعها مسروقه ولا ايه يا سحلول؟

سحلول: لأ ده يعنى لو حصل كبسه من الشرطه على المترو .. وديه احتمالتها طفيفه جدا

بهلول: طب خلاص .. يلا ننزل نشترى البضاعه

سحلول: مش لما اشوف قدراتك الاول واشوفك ايه الممنتج اللى تعرف تسوقه

بهلول: انت بتشك فى قدراتى يا سحلول .. طب شاورلى على اى حاجه  ..اى حاجه.. وانا ابيعهلك فى ثوانى

سحلول "يخرج قلم من جيبه": طيب انا هبتدى معاك باشهر مثال فى التسويق.. بيعلى القلم ده

بهلول: اسمع يا عم... معانا القلم ..القلم العجيب..القلم ابو لبيسه..عشان لما تكونى مش بتكتبي تقفليه وبكده لا يبئع شنطتك يامدام ولا يكتب على هدومك يا انسان ...ولو حصل ونسيت تقفله الحبر بتاعه بيطلع فى الغسيل كمان...وده لأن الحبر بتاعه كثافته اقل من كثافة الصابون

سحلول:هتنزل تقول للناس كثافة الحبر ..وكثافة الصابون

بهلول: لازم نستغل العلم اللى اتعلمناه فى المدارس بردوه يا سحلول...عشان نختلف عن الاخرين

سحلول: ما تنزل بسابوره واشرحلهم احسن يابهلول...الغى الحته بتاعة الكثافة ديه ...وعاوزك تبهرنى...لازم احس انى عاوز القلم اللى معاك ده..وانا القلم اللى فى جيبي ما يلزمنيش يلا سمعنى

بهلول: اسمع واتعلم..معانا القلم العجيب ...القلم ابو لبيسه..بصى الحركه ديه يا مدام اللبيسه على اد ضهر القلم كمان عشان لما تكونى بتكتبى ...تحطى اللبيسه فى ضهر القلم فما تروحش كده ولا تضيع كده

سحلول: ايه وجه انبهارك باللبيسه يا بهلول..ثم فين المدام اللى انت عمال تنادى عليها ديه اصلا؟!...انت كرهتنى فى الاقلام والكتابه ..اقولك سيبيك من مشروع الاقلام الفاشل ده اصلا...انا هسيبك انت لخيالك شوف اى حاجه فى البيت وشغل الخيال وبيعهلى...بس عايز اثاره...عايز تشويق

بهلول"يدخل المطبخ ويخرج حاملا شنطه سوداء":حد عايز من اللى جوا الشنطه...حد نفسه فى حته من اللى جوا الشنطه

سحلول: هو انت داخل تعمل فقرة الساحر يا بهلول.."سحلول يشد الشنطه من ايد بهلول": ثم ايه اللى جوا الشنطه ده.."يفتح الشنطه"....الله يقرفك مش ديه المسقعه الحمضانه

بهلول: ما انا كنت هنزل ارميها..بس شوفت انبهرت ازاى وكنت هتموت وتعرف اللى جوا الشنطه...انا كده نجحت ...نجحت

سحلول: حسبي الله ونعم الوكيل ...انت احسن عقاب لك انى اسيبك تنزل للزباين وهما هيتصرفوا معاك

بهلول: يعنى خلاص اتقبلت؟

سحلول:اه...اتلقى مصيرك بنفسك بأه ... انا هفضل مستحملك لوحدى

بهلول: طب مش هتيجى معايا نشترى البضاعه

سحلول: لأ ...روح انت .. انا هكمل الغسيل ... بس ما تنساش "خف حمله ورخص تمنه"...وخد المسقعه ديه معاك

بهلول: ما تقلقش..انا واعى اوى

"يغيب بهلول كتيــــر ...ثم يعود خالى اليدين...مع جرح قطعى فى الجبهة..وكدمه كبيره فى العين"

سحلول: حصل ايه؟

بهلول: حسبي الله ونعم الوكيل...منك لله يا بعيد

سحلول: هو مين ده...قولى عليه وانا ابهدلهولك.. اوعى يكون المعلم عكوه الجزار.. انا مش قايلك ما تعديش من ادامه

بهلول: انا بحسبن عليك انت يا سحلول

سحلول: انا!!....ليه؟

بهلول: انت مش قايلى ان محدش يقدر يطردنى

سحلول: حصل

بهلول: انا بأه قولت افرحك بيا ..جبت البضاعه ونزلت على المترو .. وعينك ما تشوف الا الضلمه

سحلول: ايه الشرطه عملت كبسه

بهلول: ياريت

سحلول: امال ايه...المترو خبطك

بهلول: لأ ده هيثم

سحلول: وهيثم عمل فيك كده ليه

بهلول: اسمه سيادة المعلم هيثم يا بغل

سحلول: جاى تشتمنى انا كنت اتشطر عليه .. عمل فيك كده ليه

بهلول: ده بأه اللى بيعمل الانترفيو فى خط المرج – حلوان.."بهلول يتحسس عينه" بس انترفيو من نوع خاص..ومحدش ينفع يشتغل فى الخط من غير ما يعدى على الانترفيو بتاعه

سحلول: طب وفين الضاعه؟

بهلول: البضاعه راحت

سحلول: كلها؟

بهلول: ما هو انا كنت موزع شويه على الزباين والباقى خده هيثم

سحلول "يقوم بعصبيه ويرتدى لبس الخروج": ازاى يعنى ياخدهم ..هى كانت عامله كم البضاعه ديه يا بهلول ...هما فاكرنها سايبه

بهلول "يمد يده بفلوس فى اتجاه سحلول " : كانت ب 150 جنيه ...ودول 245 جنيه

سحلول: 245 جنيه؟...انت مش بتقول البضاعه راحت كلها!!

بهلول: ما هو المعلم هيثم الله يكرمه بعد ما ضربنى ..مضى عقد معايا ...وادانى مناديل ..وقال انى بعد العلقه ديه هصعب ع الناس وهلم فلوس كتير .. وبصراحه فعلا الناس كانت بتدفع وما ياخدوش مناديل  .. مش بس كده دول هما كمان اللى كانوا بيدونى مناديل عشان اكبس بها ع الدم

سحلول "يمسك بالمقشه وينزل ضرب فى بهلول"

بهلول "يصرخ": وانا كنت عملتلك ايه مش كفايه هيثم

سحلول "يستمر فى ضرب بهلول": لما كدمه فى عينك جابت 245 جنيه شوف بأه لو فقعنها  خالص...ولا كسرنا رجلك هتجيب كم

بهلول: لأ عينــــــــــــــــــى

بهلول"يسقط من فوق السرير..فيستيقظ من النوم ليجد سحلول ممسكا بالمقشه وينظف الشقه "

بهلول: سيب المقشه اللى فى ايدك ديه يا سحلول وتعالى عايزك فى موضوع

سحلول:افندم

بهلول: تيجى انا افقعلك عين..وانت تفقعلى عين ونبيع مناديل فى المترو احنا الاتنين

سحلول: وماله مش عيب

بهلول"مبتسما بارتياح": انا قولت كده بردوه .. انت عمرك ما تمد ايدك عليا يا سحلول

"يخرج سحلول من الغرفه ويعود حاملا المقشه"

سحلول"ضاربا بهلول" : انا فعلا مش همد ايدى ... انا همد المقشه...عايز تشحت يا بهلول

بهلول"صارخا" انا قولت كده بردوه